# Lauds
_Triduum (Holy Thursday, Matins—Holy Saturday, None) _
_Originally from /hours/office-2/la/lauds/_
## Introduction
  
_The Our Father and Hail Mary are prayed silently._
      
  
      
        
 Pater noster, qui es in cælis, sanctificétur nomen tuum: advéniat regnum tuum: fiat volúntas tua, sicut in cælo et in terra. Panem nostrum quotidiánum da nobis hódie: et dimítte nobis débita nostra, sicut et nos dimíttimus debitóribus nostris: et ne nos indúcas in tentatiónem: sed líbera nos a malo. Amen.
        
 Ave María, grátia plena; Dóminus tecum: benedícta tu in muliéribus, et benedíctus fructus ventris tui Jesus. Sancta María, Mater Dei, ora pro nobis peccatóribus, nunc et in hora mortis nostræ. Amen.
        
      
      

    
  
## Psalmody
  

    
  

    
  
**Psalm 5**
      

    
  

      
        
Verba mea áuribus pércipe, Dómine, * intéllege clamórem meum.
        
Inténde voci oratiónis meæ, * Rex meus et Deus meus.
        
Quóniam ad te orábo: * Dómine, mane exáudies vocem meam.
        
Mane astábo tibi et vidébo: * quóniam non Deus volens iniquitátem tu es.
        
Neque habitábit iuxta te malígnus: * neque permanébunt iniústi ante óculos tuos.
        
Odísti omnes, qui operántur iniquitátem: * perdes omnes, qui loquúntur mendácium.
        
Virum sánguinum et dolósum abominábitur Dóminus: * ego autem in multitúdine misericórdiæ tuæ.
        
Introíbo in domum tuam: * adorábo ad templum sanctum tuum in timóre tuo.
        
Dómine, deduc me in iustítia tua: * propter inimícos meos dírige in conspéctu tuo viam meam.
        
Quóniam non est in ore eórum véritas: * cor eórum vanum est.
        
Sepúlcrum patens est guttur eórum, linguis suis dolóse agébant, * iúdica illos, Deus.
        
Décidant a cogitatiónibus suis, secúndum multitúdinem impietátum eórum expélle eos, * quóniam irritavérunt te, Dómine.
        
Et læténtur omnes, qui sperant in te, * in ætérnum exsultábunt: et habitábis in eis.
        
Et gloriabúntur in te omnes, qui díligunt nomen tuum, * quóniam tu benedíces iusto.
        
Dómine, ut scuto bonæ voluntátis tuæ * coronásti nos.
        
      

      

    
  

    
  
_The Glory Be is omitted._
      
  

    
  

    
  
**Psalm 142**
      

    
  

      
        
Dómine, exáudi oratiónem meam: áuribus pércipe obsecratiónem meam in veritáte tua: * exáudi me in tua iustítia.
        
Et non intres in iudícium cum servo tuo: * quia non iustificábitur in conspéctu tuo omnis vivens.
        
Quia persecútus est inimícus ánimam meam: * humiliávit in terra vitam meam.
        
Collocávit me in obscúris sicut mórtuos sǽculi: * et anxiátus est super me spíritus meus, in me turbátum est cor meum.
        
Memor fui diérum antiquórum, meditátus sum in ómnibus opéribus tuis: * in factis mánuum tuárum meditábar.
        
Expándi manus meas ad te: * ánima mea sicut terra sine aqua tibi.
        
Velóciter exáudi me, Dómine: * defécit spíritus meus.
        
Non avértas fáciem tuam a me: * et símilis ero descendéntibus in lacum.
        
Audítam fac mihi mane misericórdiam tuam: * quia in te sperávi.
        
Notam fac mihi viam, in qua ámbulem: * quia ad te levávi ánimam meam.
        
Éripe me de inimícis meis, Dómine, ad te confúgi: * doce me fácere voluntátem tuam, quia Deus meus es tu.
        
Spíritus tuus bonus dedúcet me in terram rectam: * propter nomen tuum, Dómine, vivificábis me, in æquitáte tua.
        
Edúces de tribulatióne ánimam meam: * et in misericórdia tua dispérdes inimícos meos.
        
Et perdes omnes, qui tríbulant ánimam meam: * quóniam ego servus tuus sum.
        
      

      

    
  

    
  
_The Glory Be is omitted._
      
  

    
  

    
  
**Psalm 62**
      

    
  

      
        
Deus, Deus meus, * ad te de luce vígilo.
        
Sitívit in te ánima mea, * quam multiplíciter tibi caro mea.
        
In terra desérta, et ínvia, et inaquósa: * sic in sancto appárui tibi, ut vidérem virtútem tuam, et glóriam tuam.
        
Quóniam mélior est misericórdia tua super vitas: * lábia mea laudábunt te.
        
Sic benedícam te in vita mea: * et in nómine tuo levábo manus meas.
        
Sicut ádipe et pinguédine repleátur ánima mea: * et lábiis exsultatiónis laudábit os meum.
        
Si memor fui tui super stratum meum, in matutínis meditábor in te: * quia fuísti adiútor meus.
        
Et in velaménto alárum tuárum exsultábo, adhǽsit ánima mea post te: * me suscépit déxtera tua.
        
Ipsi vero in vanum quæsiérunt ánimam meam, introíbunt in inferióra terræ: * tradéntur in manus gládii, partes vúlpium erunt.
        
Rex vero lætábitur in Deo, laudabúntur omnes qui iurant in eo: * quia obstrúctum est os loquéntium iníqua.
        
      

      

    
  

    
  
_The Glory Be is omitted._
      
  

    
  

    
  
**Canticle of Judith (Jdt 16:15–22)**
      

    
  

      
        
Hymnum cantémus Dómino, * hymnum novum cantémus Deo nostro.
        
Adonái, Dómine, magnus es tu, et præclárus in virtúte tua, * et quem superáre nemo potest.
        
Tibi sérviat omnis creatúra tua: * quia dixísti, et facta sunt:
        
Misísti spíritum tuum, et creáta sunt, * et non est qui resístat voci tuæ.
        
Montes a fundaméntis movebúntur cum aquis: * petræ, sicut cera, liquéscent ante fáciem tuam.
        
Qui autem timent te, * magni erunt apud te per ómnia.
        
Væ genti insurgénti super genus meum: Dóminus enim omnípotens vindicábit in eis, * in die iudícii visitábit illos.
        
Dabit enim ignem, et vermes in carnes eórum, * ut urántur, et séntiant usque in sempitérnum.
        
      

      

    
  

    
  
_The Glory Be is omitted._
      
  

    
  

    
  
**Psalm 55**
      

    
  

      
        
Miserére mei, Deus, quóniam conculcávit me homo: * tota die impúgnans tribulávit me.
        
Conculcavérunt me inimíci mei tota die: * quóniam multi bellántes advérsum me.
        
Ab altitúdine diéi timébo: * ego vero in te sperábo.
        
In Deo laudábo sermónes meos, in Deo sperávi: * non timébo quid fáciat mihi caro.
        
Tota die verba mea exsecrabántur: * advérsum me omnes cogitatiónes eórum in malum.
        
Inhabitábunt et abscóndent: * ipsi calcáneum meum observábunt.
        
Sicut sustinuérunt ánimam meam, pro níhilo salvos fácies illos: * in ira pópulos confrínges.
        
Deus, vitam meam annuntiávi tibi: * posuísti lácrimas meas in conspéctu tuo.
        
Sicut et in promissióne tua: * tunc converténtur inimíci mei retrórsum:
        
In quacúmque die invocávero te: * ecce, cognóvi, quóniam Deus meus es.
        
In Deo laudábo verbum, in Dómino laudábo sermónem: * in Deo sperávi, non timébo quid fáciat mihi homo.
        
In me sunt, Deus, vota tua, * quæ reddam, laudatiónes tibi.
        
Quóniam eripuísti ánimam meam de morte, et pedes meos de lapsu: * ut pláceam coram Deo in lúmine vivéntium.
        
      

      

    
  

    
  
_The Glory Be is omitted._
      
  

    
  

    
  
## Benedíctus
  

    
  

    
  
**Canticle of Zacharias (Luke 1:68–79)**
      

    
  

      
        
Benedíctus ✠ Dóminus, Deus Israël: * quia visitávit, et fecit redemptiónem plebis suæ:
        
Et eréxit cornu salútis nobis: * in domo David, púeri sui.
        
Sicut locútus est per os sanctórum, * qui a sǽculo sunt, prophetárum eius:
        
Salútem ex inimícis nostris, * et de manu ómnium, qui odérunt nos.
        
Ad faciéndam misericórdiam cum pátribus nostris: * et memorári testaménti sui sancti.
        
Iusiurándum, quod iurávit ad Ábraham patrem nostrum, * datúrum se nobis:
        
Ut sine timóre, de manu inimicórum nostrórum liberáti, * serviámus illi.
        
In sanctitáte, et justítia coram ipso, * ómnibus diébus nostris.
        
Et tu, puer, Prophéta Altíssimi vocáberis: * præíbis enim ante fáciem Dómini, paráre vias ejus:
        
Ad dandam sciéntiam salútis plebi ejus: * in remissiónem peccatórum eórum:
        
Per víscera misericórdiæ Dei nostri: * in quibus visitávit nos, óriens ex alto:
        
Illumináre his, qui in ténebris, et in umbra mortis sedent: * ad dirigéndos pedes nostros in viam pacis.
        
      

      

    
  

    
  
_The Glory Be is omitted._
      
  

    
  

    
  
## Antiphon
  
      
        
 Úsquequo exaltábitur inimícus meus super me? Réspice et exáudi me, Dómine, Deus meus.
        
      
      

    
  

    
  
_The Our Father is prayed silently._
      
  
      
        
 Pater noster, qui es in cælis, sanctificétur nomen tuum: advéniat regnum tuum: fiat volúntas tua, sicut in cælo et in terra. Panem nostrum quotidiánum da nobis hódie: et dimítte nobis débita nostra, sicut et nos dimíttimus debitóribus nostris: et ne nos indúcas in tentatiónem: sed líbera nos a malo. Amen.
        
      
      

    
  
**Psalm 12**
      

    
  

    
  
_The psalm is prayed in a lower voice._
      
  

      
        
Úsquequo, Dómine, obliviscéris me in finem? * Úsquequo avértis fáciem tuam a me?
        
Quámdiu ponam consília in ánima mea, * dolórem in corde meo per diem?
        
Úsquequo exaltábitur inimícus meus super me? * réspice, et exáudi me, Dómine, Deus meus.
        
Illúmina óculos meos ne umquam obdórmiam in morte: * nequándo dicat inimícus meus: Præválui advérsus eum.
        
Qui tríbulant me, exsultábunt si motus fúero: * ego autem in misericórdia tua sperávi.
        
Exsultábit cor meum in salutári tuo: cantábo Dómino qui bona tríbuit mihi: * et psallam nómini Dómini altíssimi.
        
      

      

    
  

    
  

    
  
_The Glory Be is omitted._
      
  
## Prayer
  
      
        
 Réspice, quǽsumus, Dómine, super hanc famíliam tuam, pro qua Dóminus noster Jesus Christus non dubitávit mánibus tradi nocéntium, et crucis subíre torméntum:
        
      
      

    
  
_The conclusion is prayed silently._
      
  
      
        
 Qui tecum vivit et regnat in unitáte Spíritus Sancti, Deus, per ómnia sǽcula sæculórum. Amen.